झापा । झापाको कचनकवल गाउँपालिका-६ स्थित बनियानी बजारबाट प्रहरीले कौडा/तास खेलिरहेको अवस्थामा चार जना जुवाडेलाई पक्राउ गरेको छ।
लक्ष्मी माध्यमिक विद्यालय अगाडिको एक किराना पसलमा सोमबार राति ११ बजेतिर जुवा खेलिरहेको भन्ने गोप्य सूचनाका आधारमा पुगेको इलाका प्रहरी कार्यालय बनियानीको टोलीले उनीहरूलाई नियन्त्रणमा लिएको हो।
प्रहरीले जुवाको खालबाट नगद ४६ हजार ९ सय ७० रुपैयाँ बरामद गरेको जनाएको छ। प्रहरी टोली पुगेलगत्तै जुवा खेलमा संलग्न अन्य दुई जना भने भागि फरार भएका थिए।
जिल्ला प्रहरी कार्यालय झापाका अनुसार पक्राउ परेकाहरूमाथि कानुनबमोजिम थप अनुसन्धान अघि बढाइएको छ भने फरार रहेका दुवै जनाको तीव्र खोजी भइरहेको छ।
