काठमाडौँ । अत्यधिक गर्मी र तीव्र हावाका कारण दक्षिण युरोपका विभिन्न देशहरूमा भीषण डढेलो फैलिँदा जनजीवन अस्तव्यस्त बनेको छ। अनियन्त्रित डढेलो बस्तीहरूतर्फ सोझिएपछि स्पेन, फ्रान्स र इटालीका प्रभावित क्षेत्रहरूबाट हजारौँ नागरिकलाई सुरक्षित स्थानतर्फ सारिएको छ।
स्पेन सरकारले राजधानी म्याड्रिड र आविला प्रान्तका बस्तीहरू डढेलोको प्रत्यक्ष जोखिममा परेपछि राष्ट्रिय आपत्कालको घोषणा गरेको छ। म्याड्रिडको पश्चिमी क्षेत्रमा पर्ने विला डेल प्राडो र सान मार्टिन दे वाल्देइग्लेसियास लगायतका क्षेत्रमा लागेको डढेलो नियन्त्रणबाहिर रहेको स्थानीय अधिकारीहरूले बताएका छन्।
यसैगरी, फ्रान्सको दक्षिण-पश्चिमी क्षेत्र जिरोन्दमा स्थिति झनै भयावह बनेको छ। फ्रान्सेली राष्ट्रपति इम्यानुएल म्याक्रोनका अनुसार त्यहाँ हालसम्म ८ हजार ७ सय हेक्टरभन्दा बढी वन क्षेत्र डढेलोले सखाप पारिसकेको छ भने करिब २० हजार मानिसलाई सुरक्षित स्थानमा लगिएको छ। संकट गहिरिँदै गएपछि फ्रान्सले युरोपेली युनियनको ‘सिभिल प्रोटेक्सन मेकानिजम’मार्फत अन्तर्राष्ट्रिय सहयोगको अपिल गरेको छ।
इटालीको सिसिली द्वीप तथा दक्षिण-पूर्वी फ्रान्सका वन क्षेत्रमा पनि डढेलो तीव्र रूपमा फैलिरहेको छ। कासाबोली, बिवोना, अलिमेना र मदोनी राष्ट्रिय उद्यान लगायतका स्थानहरू डढेलोबाट गम्भीर रूपमा प्रभावित भएका छन्।
अग्निनयन्त्रकहरू, हेलिकप्टर र आपत्कालीन उद्धार टोलीहरू डढेलो नियन्त्रणमा लिन निरन्तर खटिएका छन्। जलवायु परिवर्तनका कारण बढेको उखरमाउलो गर्मी र सुख्खा मौसमले डढेलो नियन्त्रण प्रयासमा चुनौती थपेको विज्ञहरूले बताएका छन्।
