ग्याङटोक (सिक्किम):
पहाडी काखमा अवस्थित ग्याङटोकस्थित सम्मान भवनको भव्य सभाहलमा आज हिमाली राज्य सिक्किमका सरकारी विद्यालयहरूमा स्वच्छ खानेपानी, ढल निकास तथा स्वच्छता प्रवर्द्धन गर्ने उद्देश्यका साथ ‘सुलभ अल्केम स्वच्छता पुरस्कार २०२६’ (आगाज ३.०) भव्य रूपमा सम्पन्न भएको छ।
सुलभ स्यानिटेशन क्लब (नयाँ दिल्ली), अल्केम फाउन्डेसन र सिक्किम सरकारको शिक्षा विभागको संयुक्त आयोजनामा सञ्चालन भएको यस विशेष समारोहमा राज्यका दुर्गम तथा सुगम क्षेत्रका विद्यालयहरूमा स्वच्छता कायम राख्न अतुलनीय योगदान पुर्याउने शिक्षक, विद्यार्थी तथा विद्यालयहरूलाई कदरपत्र र पुरस्कारद्वारा सम्मानित गरियो।
समारोहमा सिक्किमका शिक्षा, खेलकुद तथा युवा मामिला मन्त्री श्री राजु बस्नेत मुख्य अतिथिका रूपमा उपस्थित हुनुहुन्थ्यो। त्यसैगरी मुख्यमन्त्रीका प्रधान सचिव श्री रिन्जिङ छेवाङ भुटिया, शिक्षा विभागका प्रधान सचिव डा. सन्दीप चाम्बे, विद्यालय शिक्षा सचिव श्री ताशी छोपेल लेप्चा, सुलभ इन्टरनेसनलका नियन्त्रक महानिर्देशक श्री पङ्कज जैन तथा अल्केम ल्याबोरेटरिज सिक्किमका वरिष्ठ उपाध्यक्ष श्री रविन्दर चकिलम लगायत विभिन्न उच्चपदस्थ अधिकारीहरू, विभिन्न जिल्लाका शिक्षक तथा विद्यार्थीहरूको बाक्लो उपस्थिति रहेको थियो।
समारोहलाई सम्बोधन गर्दै मुख्य अतिथि मन्त्री राजु बस्नेतले स्वच्छता अभियानमा अहोरात्र खटेर पुरस्कार जित्न सफल सम्पूर्ण विद्यालय, शिक्षक तथा विद्यार्थीहरूलाई हार्दिक बधाई दिनुभयो। उहाँले सुलभ इन्टरनेसनलले भारतभर सार्वजनिक सरसफाइ संरचनामा पुर्याएको योगदानको उच्च प्रशंसा गर्दै सिक्किममा शिक्षा विभागको ‘मेरो स्कुल, मेरो भागीदारी’ अभियान मार्फत सार्वजनिक तथा संस्थागत सामाजिक उत्तरदायित्व (CSR) का कामहरूलाई थप व्यवस्थित र प्रभावकारी बनाइने बताउनुभयो। यसका साथै मन्त्री बस्नेतले विद्यार्थीहरूलाई घोकन्ते ज्ञानमा मात्र सीमित नरही व्यावहारिक सोच, जिज्ञासा र नवीन विचारको विकास गर्न प्रेरणा दिनुभयो।
कार्यक्रमका क्रममा सिक्किमका विभिन्न विद्यालयहरूमा सञ्चालन गरिएका स्वच्छता अभियानमा आधारित एउटा छोटा वृत्तचित्र प्रदर्शन गरिनुका साथै बालबालिकाहरूलाई खेलकै माध्यमबाट स्वच्छतासम्बन्धी ज्ञान दिन ‘वाश इन्टरएक्टिभ गेम’ (प्लेबुक र क्यारम बोर्ड) सार्वजनिक गरिएको थियो। समारोहमा वातावरण तथा विद्यालय परिसर सफा राख्न उत्कृष्ट भूमिका खेल्ने विद्यार्थीहरू लिजाङ लेप्चा, आयुष शर्मा तथा नोडल शिक्षिका एक्वाइनो शर्माले आफ्ना अनुभव र विचार साझा गर्नुभएको थियो।
यस वर्षको बहुप्रतिष्ठित ‘स्वच्छता स्कुल च्याम्पियन अवार्ड’ सरकारी वरिष्ठ माध्यमिक विद्यालय मामरिङले हात पार्न सफल भयो। त्यसैगरी चाकुङकी लिजाङ राई, नाम्चीकी अञ्जेल लेप्चा, रन्हेनोककी स्वीकृति निरौला, देउरालीकी अर्चना कुमारी, माचोङकी अयोगिता शर्मा, असम लिङ्जेकी प्रतिमा छेत्री, पेरबिङकी अस्मिता प्रधान, बरापाथिङकी रिलेज भुटिया, मामरिङका अरमान मङ्गर तथा रङ्पोकी अञ्जनी कुमारीजस्ता होनहार विद्यार्थीहरू स्वच्छता पुरस्कारबाट सम्मानित भए।
शिक्षकहरूतर्फ पेरबिङकी पूजा छेत्री, रङ्पोकी सृजना शर्मा र नाम्चीकी प्रधानाध्यापक वन्दना राईलाई स्वच्छता अभियानमा देखाएको नेतृत्वका लागि सम्मानित गरियो। पाक्याङकी जिल्ला सूचना अधिकारी डिकी डोमा भुटियालाई पनि स्वच्छता सचेतना र सूचना सम्प्रेषणमा पुर्याएको योगदानको कदर गर्दै विशेष सम्मान प्रदान गरियो।
यसअघि स्वागत मन्तव्य राख्दै सुलभ इन्टरनेसनलका नियन्त्रक महानिर्देशक श्री पङ्कज जैनले सिक्किमका १३ वटा विद्यालयमा सुरक्षित खानेपानी, सफा शौचालय र दिवा खाजाको सरसफाइ सम्बन्धी प्रभावकारी काम भइरहेको जानकारी गराउनुभयो। उहाँले सिक्किमको यो सरसफाइ मोडल सम्पूर्ण देशकै लागि एउटा उत्कृष्ट नमुना बन्ने विश्वास व्यक्त गर्नुभयो। कार्यक्रमको समापन अल्केम ल्याबोरेटरिजका वरिष्ठ उपाध्यक्ष श्री रविन्दर चकिलमको धन्यवाद ज्ञापनसँगै भएको थियो।
