झापा । जिल्लाको दक्षिणी सीमा क्षेत्रमा प्रहरी प्रशासनको मिलेमतोमा तस्करी मौलाएको भन्दै समाचार प्रकाशित भएपछि सशस्त्र प्रहरीले आफ्नो सक्रियता र अनुगमनलाई तीव्रता दिएको छ। हल्दीबारी डटकमलगायतका सञ्चार माध्यमहरूमा समाचार आएलगत्तै सशस्त्र प्रहरी बल नेपाल नम्बर २ गण हेडक्वार्टर झापाका गणपति सशस्त्र प्रहरी उपरीक्षक (एसपी) सचिन कर्माचार्यले मातहतका निकायमा कडा अनुगमन तथा निगरानी बढाएका हुन्।
गणपति कर्माचार्य आफैँ अग्रसर भई फिल्डमा उत्रिएर सीमा क्षेत्रमा कडाइ गरेपछि अवैध चोरी निकासी र तस्करीमा संलग्नहरूको भागदौड मच्चिएको छ। तस्करहरूको गतिविधिमाथि रोक लगाउन सशस्त्र प्रहरी आक्रामक रूपमा मैदानमा उत्रिएसँगै अवैधरूपमा भित्रिने सामग्रीहरू नियन्त्रणमा लिने क्रम बढेको छ।
यसै क्रममा तिहार तथा छठ पर्वलाई लक्षित गरी भारतबाट अवैध रूपमा नेपाल भित्राइएको ठूलो परिमाणको बारुदजन्य पटाका सशस्त्र प्रहरीले बरामद गरेको छ। सशस्त्र प्रहरी बल, नेपाल नम्बर २ गण हेडक्वार्टर झापाले विभिन्न समयमा र स्थानमा चलाएको चेकजाँचका क्रममा बरामद गरिएको करिब २३ लाख ५९ हजार रुपैयाँ बराबरको उक्त पटाका शुक्रबार दिउँसो गण परिसरभित्रै नष्ट गरिएको छ।
उक्त पटाका सशस्त्र प्रहरी उपरीक्षक सचिन कर्माचार्य, भद्रपुर नगरपालिका वडा नम्बर ८ का वडाध्यक्ष मनोज सुब्बा, जिल्ला प्रशासन कार्यालय तथा जिल्ला प्रहरी कार्यालय झापाका प्रतिनिधि र सञ्चारकर्मीहरूको उपस्थितिमा खाडल खनेर नष्ट गरिएको हो। चाडपर्वका बेला पटाका तथा आतसबाजीको प्रयोगले आगलागी, मानवीय दुर्घटना, धनजनको क्षति, ध्वनि प्रदूषण र वातावरणीय प्रदूषण निम्त्याउने भएकाले यस्ता प्रज्वलनशील वस्तुको ओसारपसार र बिक्रीवितरणमा पूर्ण रोक लगाउन कडा अभियान चालिएको प्रहरीले जनाएको छ।
बारुदजन्य सामग्रीको अनियन्त्रित प्रयोगले बालबालिका, ज्येष्ठ नागरिक तथा सर्वसाधारणको स्वास्थ्य र सुरक्षामा गम्भीर असर पार्ने भएकाले यस्ता सामग्री प्रयोग नगर्न सशस्त्र प्रहरीले सर्वसाधारणमा समेत विशेष आग्रह गरेको छ।
