झापा, शनिश्चरे । झापाको अर्जुनधारा नगरपालिकाले शिक्षालाई उच्च प्राथमिकतामा राख्दै नगरलाई शैक्षिक रूपमा उत्कृष्ट बनाउने अभियान अघि बढाएको छ। सोही क्रममा नगर प्रमुख बलदेवसिंह गोम्देन तामाङ एसइई परीक्षाको तयारी गरिरहेका विद्यार्थीलाई प्रोत्साहित गर्न विद्यालय–विद्यालय पुगेका छन्।
नगरपालिकाले आगामी एसइई परीक्षामा ४.० जिपिए अंक ल्याउने विद्यार्थीलाई कक्षा ११ र १२ मा निशुल्क अध्ययनको व्यवस्था गर्ने घोषणा गरेको छ। त्यस्तै, कम्तीमा ३.६ जिपिए ल्याउने विद्यार्थीलाई कक्षा ११ मा अनलाइन ट्युसन निशुल्क उपलब्ध गराइने व्यवस्था नगर प्रमुखले जानकारी दिए।
नगरमा रहेका निजी तथा सामुदायिक माध्यमिक विद्यालयका विद्यार्थीहरूसँग प्रत्यक्ष भेटघाट गर्दै उनले शैक्षिक गुणस्तर उकास्ने लक्ष्यसहित प्रोत्साहन कार्यक्रम ल्याइएको स्पष्ट पारे। उनका अनुसार लोक सेवा आयोगको तयारी गर्ने विद्यार्थीलाई लाग्ने शुल्कको ५० प्रतिशत नगरपालिकाले व्यहोर्ने व्यवस्था पनि गरिनेछ।
आज नगर प्रमुखसहितको टोलीले १० वटा विद्यालयमा पुगेर विद्यार्थीहरूसँग अन्तरक्रिया गरेको थियो। अर्जुनधारामा हाल निजी तथा सामुदायिक गरी २८ वटा माध्यमिक विद्यालय सञ्चालनमा छन्।
यसअघि पनि नगर प्रमुख गोम्देनले जिल्लास्तरीय १६औँ राष्ट्रपति रनिङ शिल्ड प्रतियोगिताका स्वर्ण पदक विजेता खेलाडीलाई स्वास्थ्य बीमा र एक वर्ष निशुल्क अध्ययनको घोषणा गरेका थिए। यसरी नगरपालिकाले शिक्षासँगै खेलकुदमा पनि प्रोत्साहनात्मक योजना ल्याउँदै समग्र विकासको अभियान अघि बढाएको जनाएको छ।
