झापा । जल तथा मौसम विज्ञान विभागको पछिल्लो पूर्वानुमान अनुसार आगामी केही दिन कोशी प्रदेशसहित देशभरकै मौसममा उल्लेखनीय परिवर्तन आउने देखिएको छ। विशेष गरी २०८२ चैत ५ गतेदेखि ७ गतेसम्म मौसम प्रतिकूल रहने सम्भावनालाई मध्यनजर गर्दै झापा जिल्ला प्रशासन तथा सरोकारवाला निकायले जिल्लाबासीहरूलाई उच्च सतर्कता अपनाउन आग्रह गरेका छन्।
चैत ५ र ६ गते देशभर आंशिकदेखि सामान्य बदली रहने तथा केही स्थानहरूमा मेघगर्जन, चट्याङ्ग, तीव्र वेगको हावाहुरी र असिनासहित हल्कादेखि मध्यम वर्षा हुने सम्भावना रहेको छ। यस्तै, चैत ७ गते कोशी प्रदेशका पहाडी तथा तराईका भू-भागहरूमा समेत वर्षाको सम्भावना रहेकाले सम्भावित जोखिमप्रति सजग रहन सूचना जारी गरिएको छ।
मौसममा आउने यस्तो परिवर्तनले जनजीवन र कृषि क्षेत्रमा प्रभाव पार्न सक्ने भएकाले विभिन्न सुरक्षात्मक उपायहरू अपनाउन अनुरोध गरिएको छ। चट्याङ्गबाट जोगिनका लागि मेघगर्जनको समयमा घरभित्रै बस्न, विद्युतीय उपकरणहरूको प्रयोग नगर्न तथा खुल्ला चौर, रुखमुनि वा पानीको स्रोत नजिक नबस्न भनिएको छ। तीव्र हावाहुरी र असिनाले बालीनाली तथा कच्ची घरटहरामा क्षति पुर्याउन सक्ने जोखिम रहेकाले तयारी अवस्थामा रहेका बालीनालीलाई सुरक्षित स्थानमा थन्क्याउन र बाहिर निस्कनुअघि मौसमको अवस्था राम्ररी बुझ्न सुझाव दिइएको छ।
यसका साथै, वर्षा र हावाहुरीका कारण सडकमा दृश्यांश (Visibility) कम हुन सक्ने र रुख वा बिजुलीका पोलहरू ढल्न सक्ने भएकाले सवारी चालकहरूलाई विशेष सावधानी अपनाएर यात्रा गर्न आग्रह गरिएको छ। कुनै पनि प्राकृतिक विपद् वा समस्या परेको खण्डमा तुरुन्तै नजिकको सुरक्षा निकाय वा स्थानीय जनप्रतिनिधिलाई खबर गर्न समेत जिल्लाबासीहरूमा हार्दिक अनुरोध गरिएको छ। मौसमको उतारचढावप्रति सचेत रहँदै सम्भावित धनजनको क्षति न्यूनीकरणमा सहयोग पुर्याउन सम्पूर्ण झापाबासीहरूमा यो विशेष अपिल जारी गरिएको हो।
