झापा । झापामा जापानिज इन्सेफ्लाइटिस (जेई) को सङ्क्रमणबाट थप एक जनाको मृत्यु भएको छ। गत साता मेचीनगर नगरपालिका–८ की ६४ वर्षीया महिलाको जेईका कारण मृत्यु भएको स्वास्थ्य कार्यालय झापाले जनाएको छ।
यससँगै जिल्लामा जापानिज इन्सेफ्लाइटिसबाट ज्यान गुमाउनेको सङ्ख्या ६ पुगेको छ भने कुल सङ्क्रमितको सङ्ख्या ११ पुगेको छ। मृत्यु हुनेमा चार महिला र दुई पुरुष रहेका छन्।
हालसम्म मेचीनगरमा दुई तथा हल्दिबारी, बाह्रदशी, बिर्तामोड र अर्जुनधारामा एक-एक जनाको मृत्यु भएको छ। सङ्क्रमण पुष्टि हुनेमा मेचीनगरका पाँच, बिर्तामोडका दुई तथा हल्दिबारी, बाह्रदशी, कचनकवल र अर्जुनधाराका एक-एक जना रहेका छन्।
सङ्क्रमित ११ जनामध्ये ६ जनाको मृत्यु भइसकेको छ भने दुई जनाको हाल उपचार भइरहेको छ। बाँकी तीन जना भने निको भएर अस्पतालबाट डिस्चार्ज भइसकेका छन्।
सङ्क्रमण पुष्टि भएका अधिकांश व्यक्ति ५० वर्षभन्दा माथिका उमेर समूहका छन्। सङ्क्रमितहरूमा एक जना सात महिनाका बालक र एक जना ४० वर्षका व्यक्ति समेत रहेको स्वास्थ्य कार्यालय झापाका जनस्वास्थ्य निरीक्षक विश्वनाथ श्रेष्ठले जानकारी दिए।
