भोलिबाट यातायात चल्ने समाचार बाहिरिदै गर्दा नेपाल यातायात व्यवसायी महासंघका महासचिव सरोज सिटौलाले भोलिबाट सार्वजनिक सवारी साधन चल्ने कुरा निराधार रहेको बताएका छन् । यद्यपि उनले यातायात सुचारु गर्ने विषयमा निरन्तर रुपमा छलफल भने भइरहेको बताए ।
आइतबार यातायात व्यवस्था विभागका महानिर्देशक गोगनबहादुर हमाललाई उदृत गर्दै सोमबारबाट सार्वजनिक सवारी साधन सुचारु हुने समाचार बाहिर आएका थिए । महासंघका महासचिव सिटौलाले कोरोना भाइरसको महामारीबीच यातायात सञ्चालन गर्ने कार्यविधिमा छलफल भइरहेको बताए ।
‘यातायात मजदुरको सुरक्षा, यात्रुको सुरक्षासहित कोरोना भाइरसको महामारीबीच कुन तरिकाले यातायात सञ्चालन गर्ने भन्नेबारे कार्यविधिमा छलफल भइरहेको छ । यातायात सञ्चालन हुने पक्का भएपछि हामी आफै पत्रकार सम्मेलन गरेर जानकारी दिने छौँ’, महासचिव सिटौलाले भने ।
सरकारले गत असार २६ गतेदेखि छोटो दूरीका सार्वजनिक सवारीसाधन सञ्चालन गर्ने निर्णय गरेपनि यातायात व्यवसायीले काम सुरु गरेका छैनन् । सिटौलाले स्वास्थ्य सुरक्षाको विषय मात्र सम्बोधन हुन बाँकी रहेको बताए ।
