झापा । इङ्ल्यान्ड राष्ट्रिय फुटबल टोलीका पूर्व कप्तान तथा पूर्व म्यानेजर केभिन कीगनको ७५ वर्षको उमेरमा निधन भएको छ। लामो समयदेखि क्यान्सर रोगसँग जुधिरहेका कीगनको सोमबार निधन भएको खबर उहाँको पूर्व क्लब न्युक्यासल युनाइटेड र इङ्ल्यान्ड फुटबल एसोसिएसनले पुष्टि गरेका छन्। सन् २०२६ को जनवरीमा कीगनको परिवारले उहाँ क्यान्सरबाट पीडित रहेको जानकारी सार्वजनिक गरेको थियो भने पछि जुन महिनामा स्वयम् कीगनले आफू ‘स्टेज ४’ क्यान्सरसँग लडिरहेको बताएका थिए।
न्युक्यासल युनाइटेडद्वारा जारी आधिकारिक शोक वक्तव्यमा कीगनको निधनले क्लब र फुटबल समर्थकहरूलाई गहिरो चोट पुगेको उल्लेख गरिएको छ। वक्तव्यमा भनिएको छ, “हाम्रा पूर्व खेलाडी तथा म्यानेजर केभिन कीगनको निधनको खबरले हामीलाई स्तब्ध बनाएको छ। उहाँ हाम्रो क्लबको इतिहासकै सबैभन्दा प्रतिष्ठित, प्रभावशाली र प्रिय व्यक्तित्वहरूमध्ये एक हुनुहुन्थ्यो। खेलाडीका रूपमा सेन्ट जेम्स पार्कमा उहाँको प्रतिभा र नेतृत्वले छुट्टै पहिचान बनाएको थियो भने म्यानेजरका रूपमा उहाँले पूरै सहरमा नयाँ उत्साह र विश्वास भर्नुभएको थियो।”
कीगनलाई इङ्लिस फुटबल इतिहासकै सबैभन्दा चमत्कारिक र प्रभावशाली खेलाडीमध्ये एक मानिन्छ। उहाँले आफ्नो व्यावसायिक करियरको सुरुवात लिभरपुलबाट गर्दै तीन पटक इङ्लिस लिग, एक पटक युरोपियन कप र दुई पटक युइएफए कपको उपाधि जिताउन मुख्य भूमिका खेलेका थिए। त्यसपछि जर्मनीको चर्चित क्लब हेम्बर्ग पुगेर उहाँले आफ्नो क्षमताको थप प्रमाण दिए, जहाँ उहाँले टोलीलाई बुण्डेसलिगा उपाधि दिलाए। निरन्तरको उत्कृष्ट प्रदर्शनका कारण उहाँले सन् १९७८ र १९७९ मा लगातार दुई पटक विश्व फुटबलको सबैभन्दा प्रतिष्ठित सम्मान ‘बेलोन डी’ओर’ (Ballon d’Or) हात पारेका थिए।
अन्तर्राष्ट्रिय फुटबलमा पनि कीगनको योगदान अतुलनीय छ। सन् १९७२ देखि १९८२ को बीचमा उहाँले इङ्ल्यान्डका लागि ६३ वटा अन्तर्राष्ट्रिय खेल खेल्दै २१ गोल गरेका थिए। यस क्रममा उहाँले ३१ वटा म्याचमा राष्ट्रिय टोलीको कप्तानी सम्हाल्दै इङ्लिस फुटबलको मूल अनुहारका रूपमा नेतृत्व प्रदान गरे। खेलाडी जीवनबाट सन्यास लिएपछि पनि उहाँले न्युक्यासल युनाइटेड, म्यानचेस्टर सिटी, फुलह्याम र इङ्ल्यान्ड राष्ट्रिय टोलीको म्यानेजरका रूपमा सफलतापूर्वक जिम्मेवारी सम्हालेका थिए। कीगनको निधनले विश्वभरका फुटबल प्रशंसकहरूलाई स्तब्ध र शोकमग्न बनाएको छ।
