झापा, २०८२ असोज २। झापाको मेचीनगर नगरपालिका-५ नकलबन्दाबाट प्रहरीले चोरीको अप्टिकल फाइबर तारसहित पाँच जनालाई नियन्त्रणमा लिएको छ।
बुधबार बिहान ११:१० बजे इलाका प्रहरी कार्यालय नकलबन्दाबाट खटिएको गस्ती टोलीले नेपालबाट भारततर्फ पाँच बोरामा प्याक गरेर लैजाँदै गरेको अवस्थामा उनीहरूलाई शंकास्पद रूपमा फेला पारेको थियो।
पक्राउ पर्नेमा दुई जना भारतीय र तीन जना नेपाली नागरिक रहेका छन्। भारतीय नागरिकहरूमा भारतको दार्जिलिङ जिल्ला, पानिट्याङ्कीका २४ वर्षीय कातिक अधिकारी र सोही स्थानका ३४ वर्षीय राहुल अधिकारी छन्।
त्यस्तै, नेपाली नागरिकहरूमा झापा, बुद्धशान्ति गाउँपालिका, शीतल बस्तीका २५ वर्षीय विजय राजवंशी, इलाम, माई नगरपालिका-३, जौबारीका २७ वर्षीय दिनेश परियार र झापा, कचनकवल गाउँपालिका-३, डाँगीबारीका ४२ वर्षीय संजय माझी रहेका छन्।
पक्राउ परेका सबैलाई आवश्यक कारबाहीका लागि इलाका प्रहरी कार्यालय, काँकरभिट्टामा राखिएको प्रहरीले जानकारी दिएको छ। घटनाबारे थप अनुसन्धान भइरहेको छ।
