ग्याङटोक, साउन ६ (जुलाई २१) ।
दक्षिण सिक्किमको नाम्ची जिल्लास्थित समरदुङ, झोलुङ्गेमा निर्माणाधीन एनएचपीसी (NHPC) तीस्ता स्टेज–६ जलविद्युत् आयोजनाको सुरुङभित्र भएको भीषण दुर्घटनामा परी कम्तीमा १० जनाको मृत्यु भएको छ। सुरुङभित्र अचानक संदिग्ध मिथेन ग्यास विस्फोट हुँदा बाक्लो धुवाँ र विषैलो ग्यास फैलिएर उक्त दुर्घटना भएको हो।
मङ्गलबार जिल्ला प्रशासनले दिएको पछिल्लो प्रतिवेदन अनुसार सुरुङबाट हालसम्म १० जनाको शव बरामद भइसकेको छ। अझै पनि केही श्रमिक तथा अधिकारीहरू सुरुङभित्रै थुनिएको आशङ्का गरिएको छ। उनीहरूलाई सुरक्षित बाहिर निकाल्न उद्धार टोलीहरूले ‘अहोरात्र’ प्रयास जारी राखेका छन्।
दुर्घटनाको गम्भीरतालाई ध्यानमा राख्दै सिक्किमका राज्यपाल ओम प्रकाश माथुर र मुख्यमन्त्री प्रेमसिंह तामाङ (गोले) मङ्गलबार दिउँसो घट्नास्थल ‘ग्राउन्ड जिरो’ पुगेर उद्धार कार्यको प्रत्यक्ष निरीक्षण तथा समीक्षा गरेका छन्।
लोकभवनद्वारा जारी प्रेस विज्ञप्ति अनुसार राज्यपाल माथुरले आपत्कालीन व्यवस्थापन अधिकारीहरूलाई उद्धार कार्यमा कुनै कसर बाँकी नराख्न र घाइतेहरूलाई सम्भव भएसम्मका सबै उत्कृष्ट स्वास्थ्य सुविधा उपलब्ध गराउन कडा निर्देशन दिएका छन्। यस दुखद् घडीमा सम्पूर्ण राज्य एकजुट भई प्रभावित परिवारलाई साथ दिनुपर्ने बताउँदै उनले मृतकहरूप्रति श्रद्धाञ्जली अर्पण गर्नुका साथै थुनिएकाहरूको सुरक्षित उद्धारको कामना गरेका छन्।
यसैबीच, मङ्गलबार सुरु भएको सिक्किमको ११औँ विधानसभाको आम बजेट अधिवेशन (२०२६–२७) को दोस्रो दिनको बैठक मृतकहरूप्रति श्रद्धाञ्जली अर्पण गर्दै सुरु भएको छ। बैठकमा घटनाप्रति गहिरो दुःख व्यक्त गर्दै दुई मिनेट मौनधारण गरियो।
सदनलाई सम्बोधन गर्दै मुख्यमन्त्री तामाङले राष्ट्रिय विपद् प्रतिक्रिया कोष (NDRF) को मापदण्ड अनुसार मृतकका परिवार र घाइतेहरूलाई क्षतिपूर्ति (अनुग्रह राशि) उपलब्ध गराइने घोषणा गरे। उनले घटनाबारे केन्द्रीय नेतृत्व निरन्तर सम्पर्कमा रहेको र प्रधानमन्त्री नरेन्द्र मोदी तथा गृहमन्त्री अमित शाहले आवश्यक सहयोगको पूर्ण आश्वासन दिएको जानकारी गराए।
सुरुङभित्र थुनिएका श्रमिकहरूको उद्धारका लागि व्यापक स्रोतसाधन परिचालन गरिएको छ। जिल्ला प्रशासन, सिक्किम राज्य विपद् व्यवस्थापन प्राधिकरण (SSDMA), सिक्किम प्रहरी, राज्य विपद् प्रतिक्रिया बल (SDRF), वारुण यन्त्र, पाक्याङ र सिलीगुडीबाट आएका राष्ट्रिय विपद् प्रतिक्रिया बल (NDRF) का टोलीका साथै भारत रिजर्भ बटालियन (IRB) र अन्य विशेषज्ञ एजेन्सीहरू उद्धारमा निरन्तर खटिएका छन्।
मुख्यमन्त्री तामाङले सर्वसाधारणलाई संयमित रहन, असत्यापित र भ्रामक सूचना नफैलाउन तथा प्रभावित श्रमिक र तिनका परिवारका लागि प्रार्थना गर्न अपिल गरेका छन्।
