अमेरिकी राष्ट्रपति डोनाल्ड ट्रम्पले रणनीतिक रूपमा अत्यन्तै संवेदनशील मानिने होर्मुज जलडमरूमध्य (स्ट्रेट अफ होर्मुज) लाई ‘नयाँ अमेरिकी क्षेत्र’ (New U.S. Territory) को संज्ञा दिएपछि अमेरिका र इरानबिचको कूटनीतिक तथा सैन्य तनाव चरम बिन्दुमा पुगेको छ।
ट्रम्पले आफ्नो सामाजिक सञ्जाल ट्रुथ सोसलमा इरान र ओमानबिच रहेको होर्मुज क्षेत्रको नक्सा सेयर गर्दै उक्त भूभाग अमेरिकाको नियन्त्रणमा रहेको दाबी गरेका हुन्। ट्रम्पले अमेरिकी नाकाबन्दी पूर्ण रूपमा लागू रहेको, समुद्री सुरुङहरू हटाइसकिएको और इरानसँग तत्काल कुनै वार्ता गर्ने योजना नरहेको समेत प्रस्ट पारेका छन्।
ट्रम्पको यस कदमप्रति इरानले तीव्र असन्तुष्टि जनाउँदै कडा आपत्ति प्रकट गरेको छ। इरानका उपविदेशमन्त्री काजेम गरीबाबादीले होर्मुजलाई अमेरिकी भूभाग भन्नु ट्रम्पको ठूलो भ्रम मात्र भएको र यो जलमार्गमा अमेरिकाको कुनै अधिकार नरहेको टिप्पणी गरेका छन्। यस्तै, इरानी वार्ताकार मोहम्मद बाकर कालिबाफले गत जुनमा भएको अन्तरिम सम्झौताका सर्तहरू पालना नभएसम्म होर्मुज जलडमरूमध्य पूर्ण रूपमा बन्द नै रहने चेतावनी दिएका छन्।
इरानले आफ्ना बन्दरगाहमाथिको नाकाबन्दी हटाउनुपर्ने, तेल प्रतिबन्ध अन्त्य गर्नुपर्ने र रोक्का गरिएका सम्पत्ति फुकुवा गर्नुपर्ने सर्तहरू अघि सारेको छ। ६० दिने वार्ताको समयावधि बिनाकुनै निष्कर्ष समाप्त भएसँगै अन्तर्राष्ट्रिय ऊर्जा बजार र वैश्विक तेल आपूर्तिमा गम्भीर असर पर्ने जोखिम बढेको छ।
