झापा । नेपालको रसुवा जिल्लास्थित भोटेकोशी नदीमा आएको भीषण बाढीका कारण १३३ भारतीय नागरिकसहित कुल ४०३ जना पर्यटक सम्पर्कविहीन भएका छन्। नेपाल पर्यटन बोर्डका अनुसार आज बिहान आएको बाढीमा परेर ६२ नेपाली र ३४१ विदेशी पर्यटक सम्पर्कविहीन भएका हुन्, जसमा बेपत्ता हुने विदेशी नागरिकमध्ये सबैभन्दा ठूलो सङ्ख्या भारतीय पर्यटकको छ।
पर्यटन बोर्डका निमित्त प्रमुख कार्यकारी अधिकृत हिक्मतसिंह ऐरका अनुसार विभिन्न ट्राभल एजेन्सीहरूमार्फत धार्मिक स्थल गोसाइँकुण्ड र कैलाश मानसरोवर यात्राका लागि निस्किएका पर्यटकहरू बाढीपछि सम्पर्कविहीन भएका हुन्। बेपत्ता हुनेहरूमा २०३ पुरुष र २०० महिला रहेका छन्।
यस प्राकृतिक विपत्तिमा भारतीय नागरिकका साथै अमेरिकाका ४७, अष्ट्रेलियाका ३४, संयुक्त अधिराज्यका ३३, क्यानडाका २४, मलेसियाका १९, युक्रेनका सात, सिङ्गापुर र दक्षिण अफ्रिकाका छ/छ तथा न्युजिल्याण्ड र जापानका पाँच/पाँच जना नागरिक परेका छन्। यसका अतिरिक्त जर्मनी, फ्रान्स, रुस, स्पेन, आयरल्याण्ड र नेदरल्याण्ड लगायत २५ भन्दा बढी देशका नागरिकहरूसँग पनि सम्पर्क हुन सकेको छैन।
बाढीका कारण उत्तरी सीमावर्ती टिमुरे र स्याफ्रुबेँसी क्षेत्रका स्थानीय बस्ती, प्रहरीचौकी तथा भन्सार कार्यालयमा व्यापक क्षति पुगेको छ। बाढीले चीनसँगको अन्तर्राष्ट्रिय नाका रसुवागढी जोड्ने सडक र पुलहरूसमेत बगाएपछि उक्त क्षेत्रमा आवतजावत ठप्प भएको छ भने उद्धार कार्यमा बाधा पुगेको छ।
नेपाल पर्यटन बोर्डले प्रभावित पर्यटकका परिवार र सर्वसाधारणका लागि जानकारी वा सहयोग प्राप्त गर्न टोल फ्री नम्बर १२३४, हटलाइन नम्बर ११४४ र पर्यटन प्रहरीको ९८५१२८९४४५ मा तुरुन्त सम्पर्क गर्न आग्रह गरेको छ।
