झापा । भोटेकोशी नदीमा आएको विनाशकारी बाढीका कारण सञ्चार सम्पर्कबाट विच्छेद बनेको रसुवाको सदरमुकाम धुञ्चेमा नेपाल रेडक्रस सोसाइटीले जेनेरेटर पुर्याएपछि स्थानीयवासीले ठूलो राहत महसुस गरेका छन्।
भदौ १० गतेको बाढीले विद्युत् आपूर्ति पूर्ण रूपमा ठप्प पारेपछि धुञ्चेका बाढीपीडित, स्थानीयवासी तथा तीर्थालुहरू विगत पाँच दिनदेखि आफ्ना आफन्त र बाहिरी संसारसँगको सम्पर्कबाट टाढा हुन बाध्य थिए।
विद्युत् सेवा अवरुद्ध भएपछि नेपाल रेडक्रस सोसाइटी रसुवा शाखा र तिलगङ्गा आँखा केन्द्रको संयुक्त पहलमा धुञ्चेमा जेनेरेटर ल्याइएको हो। रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासङ्घ (आइएफआरसी) को सहयोगमा जेनेरेटर सञ्चालनमा ल्याइएसँगै त्यहाँ निःशुल्क मोबाइल चार्ज गर्ने व्यवस्था मिलाइएको छ।
रेडक्रसका अनुसार अहिले एकैपटक एक सयभन्दा बढी मानिसहरूले जेनेरेटरमार्फत आफ्नो मोबाइल फोन चार्ज गरिरहेका छन्।
फोनमा चार्ज भएपछि टाढा रहेका परिवार तथा आफन्तलाई ‘म सुरक्षित छु’ भन्ने खबर पठाउन पाएको स्थानीयवासीहरू बताउँछन्। सम्पर्क पुनः स्थापित भएपछि एक बाढीप्रभावितले भने, “फोन कलले हाम्रो टुटेको आशालाई जोडेको छ र चिन्ताले भरिएको मनलाई सान्त्वना दिएको छ।”
बाढीका कारण बिग्रेको विद्युत् संरचना मर्मत गरी सेवा पुनः सञ्चालन गर्न प्राविधिक टोली खटिरहेको र चाँडै बत्ती बाल्ने प्रयास भइरहेको जनाइएको छ।
