झापा, २०८१ फागुन २३ । झापाको बिर्तामोड नगरपालिका-३ स्थित महेन्द्र माविमा अध्ययनरत कक्षा ९ का विद्यार्थीहरू विद्यालय पोशाकमै मादक पदार्थ सेवन गरी विद्यालय आएको घटनाले चर्चा पाएको छ।
विद्यालय प्रशासनले घटनाबारे जानकारी पाएपछि इलाका प्रहरी कार्यालय अनारमनीलाई खबर गरिएको थियो। प्रहरी चौकी बिर्ताबजारबाट खटिएको टोलीले विद्यार्थीलाई मादक पदार्थ बिक्री गरेको आरोपमा बिर्तामोड-३ बस्ने ४६ वर्षीय कुमार बस्नेतलाई नियन्त्रणमा लिएको छ।
बस्नेतलाई अभद्र व्यवहार सम्बन्धी कसुरमा म्याद थप गरी अनुसन्धान अघि बढाइएको प्रहरी स्रोतले जनाएको छ। विद्यालय प्रशासन र अभिभावकहरूले घटनाप्रति गम्भीर चिन्ता व्यक्त गरेका छन्।
