नेपालका विभिन्न हिमाली तथा पहाडी भेगमा आएको विनाशकारी बाढी र पहिरोपछि प्रभावित बनेका क्षेत्रहरूमा नेपाली सेनाले द्रुत गतिमा खोज, उद्धार तथा राहत कार्य सञ्चालन गरिरहेको छ। भोटेकोशी नदीमा आएको भीषण बाढी र त्यसले निम्त्याएको सङ्कटबीच नेपाली सेनाका सुरक्षाकर्मीहरू ज्यानको बाजी लगाएर पीडितहरूको रक्षामा खटिएका छन्।
प्राप्त पछिल्लो जानकारी अनुसार, असोज १ गते साँझ ६:३० बजेसम्म नेपाली सेनाको हेलिकप्टर तथा हवाई साधनमार्फत विभिन्न जोखिमपूर्ण इलाकाहरूबाट हालसम्म कुल ४ हजार १९१ जनाको सफल उद्धार गरिएको छ। उद्धार गरिएकाहरूमा ३ हजार ९०८ जना स्थानीय नागरिक र २८३ जना विदेशी पर्यटक तथा नागरिकहरू रहेका छन्।
बाढी र पहिरोका कारण जलविद्युत् आयोजनाका सुरुङ (टनेल) हरूभित्र अवस्था निकै भयानक बनेको छ। माथिल्लो त्रिशूली–१ जलविद्युत् आयोजनाको टनेलभित्र सेना र आयोजनाका प्रतिनिधिहरूको संयुक्त टोलीले अहोरात्र खोजी कार्य जारी राखेको छ। खोजीका क्रममा फेला परेका मानव अङ्ग तथा शवहरू निकाल्ने जोखिमपूर्ण काम भइरहेको छ।
यसैगरी, त्रिशूली ३‘ए’ को टनेल तथा पावर हाउस क्षेत्रमा पनि खोजी कार्य तीव्र पारिएको छ। उता त्रिशूली ३‘बी’ को पावर हाउस इलाकामा एक्सकाभेटर (Excavator) र लोडरजस्ता भारी मेसिनको प्रयोग गरी उत्खनन गरिए तापनि हालसम्म केही फेला पर्न सकेको छैन। सेनाले ती क्षेत्रहरूमा खोजी अभियान जारी राखेको जनाएको छ।
सडक सम्पर्क टुटेका र दुर्गम बनेका पहाडी इलाकाहरूमा सेनाले आधुनिक प्रविधिको प्रयोग गर्दै ड्रोनमार्फत राहत सामग्री पुर्याउने काम गरिरहेको छ। रसुवा तथा नुवाकोट जिल्लाका त्रिशूली पारि कोलोनी, तुप्चे, दानसिङ, सामरी भञ्ज्याङ्ग, कालिकास्थान र मान्चेत जस्ता स्थानहरूमा अस्थायी वेश स्थापना गरी पैदल गस्तीमार्फत घाइते तथा बेपत्ताहरूको खोजी भइरहेको छ। स्याफ्रुवेशी क्षेत्रमा मात्रै ३ वटा टोली पूर्ण रूपमा उद्धारमा केन्द्रित छन्।
नेपालको उत्तरी सीमावर्ती रसुवाको टिमुरेदेखि नुवाकोट, धादिङ, चितवन र नवलपरासी पूर्वका बाढी प्रभावित क्षेत्रहरूमा नेपाली सेनाका ८ हजार ७ सय भन्दा बढी जवानहरू प्रत्यक्ष रूपमा मैदानमा उत्रिएका छन्। उनीहरूले घाइतेहरूको उद्धार, शव व्यवस्थापन, राहत सामग्री वितरण, अवरुद्ध सडक तथा पुलको मर्मत र आपत्कालीन स्वास्थ्य उपचारमा सहजीकरण गरिरहेका छन्। सेनाले स्थानीय बाढीपीडित परिवारलाई भावनात्मक टेवा दिनुका साथै धार्मिक संस्कार र श्रद्धाञ्जली कार्यमा समेत सहयोग पुर्याउँदै आएको छ।
स्वास्थ्य उपचारका लागि नेपाली सेनाले त्रिशूली र धुन्चेमा स्थापना गरेको आपत्कालीन उपचार केन्द्र तथा मेडिकल पट्रोलमार्फत बिहीबार मात्रै २८ जनाले उपचार पाएका छन्। हालसम्म यी उपचार केन्द्रहरूबाट ३ हजार ९६६ जना प्रभावित नागरिकले स्वास्थ्य सेवा लिइसकेका छन्।
यसैबीच बाढीका कारण भासिएर अवरुद्ध बनेको पृथ्वी राजमार्ग अन्तर्गत धादिङको शीतल बजार क्षेत्रमा सडक खुलाउने कार्य युद्धस्तरमा भइरहेको छ। त्यसैगरी बेत्रावती नदीमा आवतजावत पुनः सुचारु गराउन सेना र अन्य सुरक्षा निकायका जवानहरू अस्थायी पुल निर्माणमा खटिएका छन्।
