इलाम । इलाम, माई नगरपालिका–४ सिञ्जालीटारमा ज्वाईंले जेठी सासूको धारिलो हतियार प्रहार गरी हत्या गरेका छन्। शुक्रबार साँझ ७ बजेतिर ५२ वर्षीया भूमिका चापागाईंलाई ४२ वर्षीय शान्तिराम दुलालले टाउकामा धारिलो हतियार प्रहार गरी गम्भीर घाइते बनाएका थिए।
गर्दन र कन्चटमा गहिरो चोट लागेकी चापागाईंलाई तत्काल माई अस्पताल लगिए पनि उपचार सम्भव नभएपछि बिर्तामोडस्थित बि एण्ड सी अस्पताल पुर्याइएको थियो। तर उपचारका क्रममा शुक्रबार राति १०:२० बजे उनको मृत्यु भएको जिल्ला प्रहरी कार्यालय इलामले जनाएको छ।
प्रहरीका अनुसार शान्तिराम र उनकी श्रीमती गीताबीच अंश र माना चामलसम्बन्धी मुद्दा चलिरहेको थियो। सोही क्रममा भूमिका चापागाईंसँग पनि अदालत परिसरमा विवाद भएको र भूमिकाले शान्तिरामविरुद्ध अभद्र व्यवहारको उजुरी दिएको स्थानीयले बताएका छन्।
उक्त उजुरीपछि प्रहरीले शान्तिरामको खोजी गरिरहेको थियो। हत्या पछि शान्तिरामलाई प्रहरीले पक्राउ गरी थप अनुसन्धान भइरहेको जानकारी दिएको छ।
