हल्दिबारी (झापा) । वाई-वाई कप यू-१९ राष्ट्रिय क्रिकेट प्रतियोगिताका लागि हल्दीबारी -४ का गगन बिमली झापा जिल्लाको २४ सदस्यीय प्रारम्भिक टोलीमा छनोट भएका छन्।
नेपाल क्रिकेट संघ (क्यान) को वार्षिक कार्यक्रमअनुसार झापा जिल्ला क्रिकेट संघले आयोजना गरेको छनोट प्रतियोगिताका आधारमा उनी बन्द प्रशिक्षणका लागि छानिएका हुन्। संघले गत वैशाख २० गतेदेखि ४ वटा टोली बनाएर सञ्चालन गरेको छनोट प्रतिस्पर्धाबाट उत्कृष्ट प्रदर्शन गर्ने खेलाडीहरूलाई बन्द प्रशिक्षणका लागि छनोट गरेको हो।
पूर्व निर्धारित समयमा प्रतियोगिता सञ्चालन हुन नसकेकाले आगामी खेलहरूलाई लक्षित गर्दै टोलीको तयारी तथा प्रशिक्षण कार्यक्रम अघि बढाउन लागिएको झापा जिल्ला क्रिकेट संघका अध्यक्ष प्रबिन थापाले जानकारी दिए।
छनोट टोलीमा गगन बिमलीसहित सुगम बुढाथोकी, राजीव महतो, एलेक्स मण्डल, उत्तम राजवंशी, रेमो कार्की, सन्तोष सिंह, रिजन आङदेम्बे, अंकित आचार्य, रिजल रिमाल, क्षितिज प्रसाईं, एगल्स अधिकारी र अर्पण कोइराला परेका छन्। त्यसैगरी दिप्सन पौडेल, प्रशान्त बुढाथोकी, निरज भट्टराई, युवराज भट्टराई, दिप्सन श्रेष्ठ, दिप्सन किसान, युनिक गौतम, बिधि सिन्देल, दर्पण सिवाकोटी, रुजल सुन्दास र उज्ज्वल खतीवडा पनि २४ सदस्यीय बन्द प्रशिक्षण टोलीमा अटाउन सफल भएका छन्।
छनोटमा परेका खेलाडीहरूलाई चाँडै नै बन्द प्रशिक्षणमा समावेश गराइनेछ भने प्रशिक्षणको स्थान, मिति र समयबारे संघले छिट्टै अर्को सूचनामार्फत जानकारी गराउने जनाएको छ।
