हल्दीबारी, झापा — झापाको हल्दीबारी गाउँपालिकामा असोज ५ गतेदेखि जापानीज इन्सेफ्लाइटिस विरुद्धको बृहत् खोप अभियान सञ्चालन हुने भएको छ। अभियानलाई प्रभावकारी बनाउन र समुदायस्तरमा व्यापक प्रचार-प्रसार पुर्याउन गाउँपालिका स्वास्थ्य शाखाको आयोजनामा स्थानीय सामुदायिक तथा संस्थागत विद्यालयका प्रधानाध्यापक, शिक्षक र सञ्चारकर्मीहरूका लागि विशेष अभिमुखीकरण कार्यक्रम सम्पन्न गरिएको छ।
जापानीज इन्सेफ्लाइटिस सङ्क्रमणका कारण हल्दीबारीमा एक जनाको मृत्यु भइसकेकाले यस गाउँपालिकालाई जिल्लामै उच्च जोखिमयुक्त र संवेदनशील क्षेत्रका रूपमा हेरिएको छ। सम्भावित जोखिमबाट पालिकावासीलाई जोगाउन स्वास्थ्य शाखाले ३० वर्षभन्दा माथिका सबै नागरिकहरूलाई अनिवार्य रूपमा खोप लगाउन आह्वान गरेको छ।
गाउँपालिकाका स्वास्थ्य शाखा प्रमुख पुष्कर निरौलाका अनुसार असोज ५ गतेदेखि सुरु हुने अभियानमा लक्षित समूहसम्म सही सूचना पुगोस् र खोपबारे कुनै भ्रम नरहोस् भन्ने उद्देश्यले शिक्षक र सञ्चारकर्मीहरूसँग अभिमुखीकरण गरिएको हो। समाजमा शिक्षक र पत्रकारहरूको भूमिका महत्वपूर्ण हुने भएकाले विद्यालय र सञ्चारमाध्यममार्फत अभियानको प्रचार-प्रसार चुस्त बनाइने उहाँले जानकारी दिनुभयो।
स्वास्थ्य शाखाले असोज ५ गतेदेखि सञ्चालन हुने यस खोप शिविरमा आफ्नो पायक पर्ने नजिकैको खोप केन्द्रमा पुगी समयमै खोप लगाएर आफ्नो र परिवारको स्वास्थ्य सुरक्षित राख्न सम्पूर्ण हल्दीबारीवासीमा हार्दिक अपिल गरेको छ।
