झापामा प्रदेशस्तरीय ‘उपाध्यक्ष कप कराते’ हुने, ३५० भन्दा बढी खेलाडी भिड्दै
झापा । झापाको बाह्रदशी गाउँपालिकामा प्रथम बाह्रदशी उपाध्यक्ष कप आमन्त्रित कोशी प्रदेशस्तरीय कराते प्रतियोगिता आयोजना हुने भएको छ। बाह्रदशी कराते डोजोको आयोजनामा यही असोज ११ गते उक्त प्रतियोगिता हुन लागेको हो।
प्रतियोगितामा कोशी प्रदेशका झापा, मोरङ, सुनसरी र इलामका गरी ३५० भन्दा बढी खेलाडीको सहभागिता रहने आयोजक समितिले जनाएको छ।
शनिबार वडा नम्बर ६ स्थित बिहीबारे बजार व्यवस्थापन समितिको सभा हलमा पत्रकार सम्मेलन गर्दै बाह्रदशी खेलकुद विकास समितिका अध्यक्ष डिकबहादुर श्रेष्ठले प्रतियोगिताको तयारीबारे जानकारी गराएका हुन्।
आयोजक समितिका कराते प्रशिक्षक मुकेश गजमेरका अनुसार प्रतियोगितामा २५, ३०, ३५, ४०, ४५, ५०, ५५ केजी र ६० केजीभन्दा माथिको तौल समूहमा महिला तथा पुरुष खेलाडीहरूले प्रतिस्पर्धा गर्नेछन्।
प्रतियोगितामा आयोजक बाह्रदशी गाउँपालिकासहित हल्दीबारी, बुद्धशान्ति, कन्काई, दमक, बिर्तामोड र अर्जुनधाराका साथै मोरङ, सुनसरी र इलामका खेलाडीहरू मैदानमा उत्रिनेछन्।
प्रतियोगिता सम्पन्न गर्न करिब ६ लाख रुपैयाँ खर्च हुने अनुमान गरिएको छ। रकम व्यवस्थापनका लागि गाउँपालिका, वडा कार्यालयहरू र स्थानीय व्यवसायीहरूसँग सहयोगको अपिल गरिएको वडा नम्बर ६ का वडा सदस्य एवं खेल आयोजक समितिका सल्लाहकार गङ्गाराम धितालले जानकारी दिए।
गाउँपालिकामै पहिलोपटक आयोजना हुन लागेको यो प्रतियोगिता पालिकाकै गौरवको कार्यक्रम भएकाले स्थानीय तह र सबै पक्षबाट भरपूर सहयोग रहने विश्वास धितालले व्यक्त गरे।
प्रतियोगितामा प्रथम, द्वितीय र तृतीय हुने टिमले क्रमशः नगद ३० हजार, २० हजार र १० हजार रुपैयाँका साथै ट्रफी र मेडल प्राप्त गर्नेछन्। यस्तै, विधागत रूपमा उत्कृष्ट ठहरिने खेलाडीहरूलाई पनि मेडल र प्रमाणपत्रसहित पुरस्कृत गरिने आयोजक समितिले जनाएको छ।
