गान्तोक, २५ अक्टोबर । हिन्दी साहित्यका वरिष्ठ साहित्यकार जयप्रकाश मानसलाई प्रतिष्ठित ‘अमरावती सृजन पुरस्कार २०२६’ बाट सम्मानित गरिएको छ।
’आपका तिस्ता हिमालय’ मासिक पत्रिका र उत्तर बंग हिन्दी ग्रन्थागारको संयुक्त आयोजनामा गान्तोकनजिक रावते रुम्तेकस्थित एक होटलमा आयोजित भव्य समारोहका बीच उनलाई उक्त पुरस्कार प्रदान गरिएको हो। ‘आपका तिस्ता हिमालय’ पत्रिकाद्वारा वार्षिक रूपमा प्रदान गरिने यस पुरस्कारमा नगद राशि, सम्मानपत्र र स्मृतिचिह्न समावेश छन्।
डा. तारावती अग्रवालको अध्यक्षतामा सम्पन्न उक्त कार्यक्रममा वरिष्ठ साहित्यकार मानस विशिष्ट अतिथिका रूपमा उपस्थित थिए। कार्यक्रममा रामकिशोर मेहता, शैलेन्द्र चौहान, डा. आदित्य विक्रम सिंह, डा. प्रदीप त्रिपाठी, शायर मुमताज तथा पत्रिकाका सम्पादक डा. आरपी सिंहलगायत साहित्यिक व्यक्तित्वहरूको उपस्थिति थियो।
पुरस्कार वितरण समारोहसँगै आयोजित व्याख्यान सत्रमा डा. तारावती अग्रवाल, डा. आदित्य विक्रम सिंह, डा. प्रदीप त्रिपाठी, रामकिशोर मेहता, शैलेन्द्र चौहान र देवेन्द्रनाथ शुक्लले कविता, साहित्य तथा कलाका विविध पक्षमाथि आफ्ना विचार प्रस्तुत गरेका थिए।
पुरस्कार ग्रहणपछि मन्तव्य राख्दै पुरस्कृत साहित्यकार मानसले जीवनका ससाना घटना तथा प्रकृतिका सामान्य पक्षहरूलाई कवितामा रूपान्तरण गर्ने आफ्नो सिर्जनात्मक यात्राबारे चर्चा गरे। जीवनका विविध दर्शन र अनुभूतिलाई कवितामार्फत अभिव्यक्त गर्दै उनले कविताविनाको जीवन अपूर्ण हुने विचार व्यक्त गरे। कार्यक्रममा उनको काव्यात्मक प्रस्तुतिले साहित्यप्रेमीहरूलाई मन्त्रमुग्ध बनाएको थियो।
कार्यक्रमको अध्यक्षीय मन्तव्य राख्दै डा. तारावती अग्रवालले नारी सशक्तीकरण तथा छोरीहरूको सम्मानका लागि दिइने नारालाई सरकारले व्यवहारमा उतार्नुपर्ने आवश्यकतामाथि जोड दिइन्। हालै जन्तरमन्तरमा भएका घटनाहरूको सन्दर्भ उल्लेख गर्दै उनले युवा पुस्ताको व्यवहार र अभिव्यक्तिप्रति सरकारको दृष्टिकोणमाथि प्रश्न उठाइन्। आजका किशोरकिशोरीहरूको व्यवहार र संस्कारलाई बुझ्न उनीहरूको हुर्काइ, सामाजिक वातावरण तथा त्यसमा राज्यको भूमिकासमेत गम्भीरतापूर्वक समीक्षा गर्नुपर्ने उनको भनाइ थियो।
समारोहको दोस्रो सत्रमा आयोजित कवितावाचन कार्यक्रममा सिक्किमका स्थानीय कविहरू प्रवीण खालिङ, दीपा राई, जीविका अश्रु, अमर बानिया लोहोरो, शिव न्यौपाने, सुजाता पुरोहित र आदित्य सिंहलगायतका कविहरूले आफ्ना रचना प्रस्तुत गरेका थिए।
कार्यक्रममा सिक्किमका पूर्वमन्त्री सीबी कार्की, वरिष्ठ अधिवक्ता हेमलाल भण्डारी तथा स्थानीय साहित्यप्रेमीहरूको बाक्लो उपस्थिति थियो। कार्यक्रमको सञ्चालन डा. आदित्य सिंहले गरेका थिए भने स्मृति कार्कीले धन्यवाद ज्ञापन गरेकी थिइन्।
