राजवंशी भाषिक कविता : “प्रितेर भमरा”
सन्तेर हावा, जेईखुन,
फुलेर गाँछत्, लागेचे।
मँहक उठेचे, फुलेर बासना
प्रिते प्रितक, डाकेचे ।।
सपन कुर्हाए, प्रितेर भमरा,
बागाने बगाने, जे छाँकेचे।
कुश्याचे बईसेर, उन्माद तरंग
जवानीरे, हावा लागेचे ।।
हिला डुला करे, पात पतंगरला
प्रितेर बाँखानते, जे नाँचेचे।
हल्हलाचे, हरियाली बसन्त ,
प्रितेर गुनगानते, हाँसेचे ।।
कि करे माली, दग्दगाँचे डाली,
उराए भमरा, बागानते फाँसेचे।
प्रितेर फुलक, मलजल कराए,
माली फुल्डक, सजाँए राखेचे ।।
ना मन्झ्रोक, प्रितेर फुलेर ठाँली
माली आफ्नार, जीवन बाँखेचे।
प्रितेर संसार, अमूल्य छे बड् कहे
रसाल प्रितेर, भमराक डाँकेचे ।।
जोगेन्द्र प्रसाद राजवंशी
कचनकवल :- ३, दल्की झापा
हाल :- मलेसिया
